Roman Dobrzyński

Roman Dobrzyński (1.11.1937 – 13.11.2025)

Dum kiam mi verkis la enkondukan tekston, kiu sube, ankoraŭ Roman sidis apud mi kaj multe ni diskutis pri la kunaj projektoj, ankaŭ pri la filmoj, kiujn li deziris realigi. Nun, kiam mi skribas la vortojn, bedaŭrinde mi sidas sola. Antaŭ tri tagoj mia kaj nia amiko, kvazaŭ ano de nia provizora redakcio, foriris en la alian mondon. La 13an de novembro frapis nin ĉiujn informo, ke survoje al Bjalistoko, ankoraŭ antaŭ eniro en la trajnon, Roman perdis konscion kaj… Multaj jaroj de kuna laboro pri multaj projektoj, de kuna agado pri popularigado de Esperanto, de nepriskribebla amikumado… Roman – dankon!
Irek.

La enhavo

Konataj Nekonataj de Gosia,
Romano pri Romano – fragmentoj,
Iom pri la Verda Simio,
Rememoro pri Erica Dobrzyński,
Sinjoro Tadeo parolas Esperante,
Interparolo pri Sinjoro Tadeo,
Historio de Mazi en Gondolando,
Impresoj pri la 91a Germana E-Kongreso,
Post vizito en Frizlando,
Bona Espero – Idealo kaj realo.

   
Unu el la libroj de Roman Dobrzyński tradukita en multajn lingvojn
“La Zamenhof-strato”.

Malfacilas ion skribi pri tiuj homoj kiel Roman. Necesus verki libron, eĉ ŝajne ne unu. Lian koncizan biografion eksciu do pere de Vikipedio. Por mi, Roman, ekde komenco apartenas al la plej firmaj esperantistoj, nun ankaŭ amikoj. Konas mi lin longe, fakte ne nur pro esperantistiĝo. Li apartenis al la famaj ĵurnalistoj de la Pola Televido, pli frue do mi aŭdis pri li, vidis lin en la programoj pri la latina ameriko, spektis liajn geografi-sciencajn filmojn. Fakte pro li, eĉ, mi scias pri Esperanto. Iam, kiam mi ankoraŭ bazlernejumis, en unu el iniciatitaj de li porinfanaj televidaj programoj, oni lanĉis la lingvon internacian. Tiam mi eksciis pri Esperanto kaj fiksis en memoro la unuan internacian vorton: telefono.

Kia esperantisto estas Roman? Tia, ke neniam observas li, sed ĉiam aktive kontribuas kaj kunagas. Famulo, kiu ne nur prezentas eksterordinaran personan kulturon, ne nur altkvalite prelegas, sed ankaŭ senhonte prenas flugfoliojn por disdoni ilin surstrate kaj kune kun ni informi pri Esperanto dum kiam la aliaj signifaj esperantistoj observas. Ne multaj tiaj estas.
Irek.